hit tracker رواية فتاة انحنت من أجل الحب الفصل الرابع 4 بقلم دودو محمد – Newsmix.pics

رواية فتاة انحنت من أجل الحب الفصل الرابع 4 بقلم دودو محمد

رواية فتاة انحنت من أجل الحب الفصل الرابع 4 بقلم دودو محمد

رواية فتاة انحنت من أجل الحب الجزء الرابع

رواية فتاة انحنت من أجل الحب البارت الرابع

رواية فتاة انحنت من أجل الحب الحلقة الرابعة

فى شقة توفيق
فى اوضت ريم
كانت ريم قعده فى اوضتها وعماله تعيط وسمعت صوت الباب بيخبط فكرتها زهراء مسحت دموعها وقالت ادخلى
شريف / مينفعش ادخل انا طيب
ريم / ابيه شريف ادخل طبعآ
شريف / دخل وقفل الباب وراه وقعد جنبها على السرير وقال القمر بتاعى ماله النهارده
ريم / سلامتك يا أبيه مفيش حاجه بس رجعت من الكليه تعبانه شويه
شريف / وهو اللى بيبقى تعبان شويه عيونه تبقى دبلانه كده من كتر العياط وحزينه
ريم / مسكت دموعها بالعافيه وقالت لاء بس ده شوية إرهاق
شريف / شدها فى حضنه وقال ريمو يا قلبى انتى عارفه أن انا مش بعتبرك اختى الصغيره لاء انا بعتبرك بنتى واى حاجه بتحسى بيها وبتوجعك بتوجعنى انا كمان واكيد هبقى مبسوط لو فتحتى ليا قلبك وقولتى ليا كل اللى تعبك من جواكى بدل ما انتى علطول كاتمه فى نفسك كده وصدقينى هتلاقينى اب واخ وصديق ليكى
ريم / دموعها نزلت منها وقالت اللى انا حاسه بيه مقدرش اقولهولك يا أبيه صعب تفهمني
شريف / جربى مش هتخسرى حاجه
ريم / خرجت من حضنه ومسحت دموعها وقالت معلش يا أبيه بجد مش حابه اتكلم فى الموضوع ده
شريف / مسك وشها ما بين أيده وقال بصى براحتك مش هغصب عليكى فى حاجه بس اى وقت محتاجه تتكلمى معايه فيه هتلاقينى موجود ومستعد اسمعك ماشى
ريم / هزت راسها بمعنى ماشى
شريف / بسها فى راسها وقال يلا يا حبيبتى تصبحى على خير
ريم / وانت من أهله يا أبيه
شريف / خرج من اوضت ريم وكانت نبيله واقفه وراه الباب اتخض وقال ايه يا ماما انتى واقفه بتلمعى اوكر مش عيب عليكى فى السن ده
نبيله / ولا لم لسانك انا كنت عايزه اطمن على ريم قلبى واجعنى عليها اوى وصعبان عليا حالتها دى ومش راضيه تقولى حاجه قولت يمكن تقولك انت
شريف / لاء برضه مرضتش تقولى حاجه
وفى الوقت ده جت زهراء وقالت
زهراء /هو فى ايه انتو عاملين اجتماع قدام باب اوضتنا ليه كده
نبيله / اصل انتى بنأدمه معندكيش دم ومش فارق معاكى اختك ولا حاجه خالص
زهراء / انتو ليه مكبرينها كده تلاقيها فى الجامعه حد كلمها بطريقه وحشه وبنتك مدلعه ومش بتحب حد يزعقلها
نبيله / هى برضه اللى مدلعه اقول ايه ربنا يهديكى يا بنت بطنى ومشيت وسابتهم
زهراء / شيفو هو فى ايه
شريف / يا بنتى كنا بنطمن على اختك مالها بس هى مرضتش تتكلم مع حد بقولك ايه ما ينوبك ثواب حاولى تتكلمى معاها انتى بنت زيها يمكن ترضى تقولك مالها
زهراء / انا دى لو اتكلمت مع الناس كلها هتيجى لحد عندى وتسكت
شريف / بشوف الاخوات البنات تملى أصحاب الا انتى واختك تملى ناقر ونقير مع بعض
زهراء / بغيظ علشان هى البت المدلله عند امك وتملى شايفه نفسها عليا
شريف / ضربها على دماغها وقال يا بت بلاش الأفكار السو دى اللى فى دماغك امك بتحبكم انتو الاتنين زى بعض مش بتفرق ما بنكم انتى اللى دماغك تعبانه
زهراء / بزعل اه فعلا عمومآ اوعى كده هدخل انام تصبح على خير
شريف / بزعل على أخته وانتى من أهله يا مجنونه ولعب بأيده فى شعرها ودخل على اوضه ونام
_________________________________
فى فيلا روز
نزلت روز من اوضتها علشان تتعشا وقعدت على السفره وقالت
روز / دادى عملت ايه فى موضوع المدرس اللى قولت لحضرتك عليه
سليم / جبت رقمه النهارده وكلمته واتفقت معاه هيجى الفيلا بكره بعد المدرسه
روز / وعرف مين اللى هيديها الدرس
سليم / لاء انا قولت ليه أن بنتى فى ثانويه وعايزك تديها درس واديته العنوان وقال إن هو هيجى بكره بعد معاد المدرسه
روز / بفرحه YES
سليم / بص لمادلين بأستغراب وبعدين بص لروز وقال ممكن اعرف سبب فرحتك دى بالمدرس ده
روز / ها م.م.مفيش دادى بس فرحانه علشان هفهم المنهج علشان حضرتك عارف بحب اكون الاولى فى دراستى وكنت زعلانه على المنهج اللى فاتنى
سليم / بتفهم اوك بكره متتأخريش بعد ما تخرجى من المدرسه تيجى هنا علطول
روز / اوك دادى ووقفت وقالت تصبحو على خير
مادلين / اقعدى كملى اكلك
روز /NO اكلت الحمدالله
سليم / ماشى يا حبيبتى اطلعى نامى
روز / باست ابوها وامها فى خدهم وقالت good night
سليم ومادلين / good night
روز / طلعت تجرى على اوضتها ومسكت تليفونها وطلبت رقم جهاد وانتظرت الرد
جهاد / ايه يا بنتى فى حد يتصل بحد دلوقتى
روز / You are his donkey
جهاد /ليه الشتيمه بس
روز / علشان مفيش واحده ترد كده علطول الناس تقول السلام عليكم هاى مش تقولى فى حد يتصل بحد دلوقتى
جهاد / يوه اتخضيت اعمل ايه انا طه
روز / ما علينا انا كنت متصله بيكى علشان اقولك اللى اسمه سامح ده جاى بكره عندنا الفيلا بعد المدرسه
جهاد / والله بجد
روز / بفرحه yas
جهاد / برضه عندى سؤال محيرنى
روز / ايه هو
جهاد / يعنى الخبر ده مكنش ينفع يستنا بكره تقوليه ليا فى المدرسه لما نتقابل
روز / تصدقى انا غلطانه أن عبرتك وكلمتك سلام
جهاد / استنى بس بهزر وربنا متبقيش قماصه بسرعه كده
روز / دمك تقيل على فكره
جهاد / سبحان الله ناس كتير بتقولى كده وانا برضه مش مقتنعه بالموضوع ده
روز / المهم هبدأ من بكره الرهان جاهزه
جهاد / جاهزه يا ابنى جاك صاروخ فى معاميعك
روز / what
جهاد / هههههههه اطاطا
روز / انتى بجد فظيعه
جهاد / هههههههههه يلا تصبحى على خير
روز / good night
جهاد / اللهى يطنططو عليكى سبع عفاريت يكنو لسه راضعين من امهم ويقشطو عليكى يا بعيده ما تكلمى امى عربى وقولى وانتى من أهله
روز / what يعنى ايه يقشطو دى
جهاد / يعنى انتى اخدى بالك من يقشطو ومأخديش بالك من العفاريت اما انتى غريبه بجد
روز / انا عارفه يعنى ايه عفاريت بس الكلمه التانيه دى غريبه
جهاد / يقشطو دى يعنى الطفل يقشط يرجع اللبن بعد ما يرضع من أمه
روز / يععععععع مقرفه اقفلى يا معفنه باى
جهاد / هههههههههههه باى
روز / قفلت مع جهاد وحطت التليفون جنبها وبصت على السقف وضحكة وقالت انا وانت والزمن طويل يا سامح هعرفك مين روز سليم وازاى تكلمها كده وغمضت عينيها ونامت
_________________________________
فى شقة توفيق
فى اوضت ريم وزهراء
دخلت زهراء وقعدت على سريرها وبصت لريم وشافت عينيها دبلانه من العياط صعبت عليها وقالت
زهراء / احم انتى فى حاجه مزعلاكى
ريم / هزت راسها بمعنى لاء
زهراء / بس شكلك معيطه كتير
ريم / وده هيفرق معاكى فى حاجه
زهراء / بزعل لاء مش هيفرق تصبحى على خير ونامت على السرير وغطت وشها
ريم / بصت على زهراء وهى نايمه على السرير بزعل وقامت طفت النور ورجعت نامت على سريرها ودموعها على خدها
_________________________________
اشرقت شمس صباح يوم جديد بنورها الساطع فى سماء القاهره لتفتح زهراء عينيها على صوت تليفونها
بصت فيه لاقته رقم غريب ردت وقالت
زهراء /الو مين معايا
الصوت / انا كنت مفكر أن شكلك بس اللى حلو طلع كمان صوتك احلى واحلى
زهراء / مين معايا
الصوت / انا اسلام محجوب
زهراء / قعدت مصدومه على السرير وبصت على سرير ريم لاقته فاضى بلعت ريقها بالعافيه وقالت ا.ا انت جبت رقمى منين
اسلام / عيب عليكى لما تسألينى سؤال زى ده انا اجيب اى حاجه عايزه بأشاره واحده منى
زهراء / احم بس مش لدرجة توصل لرقم تليفونى
اسلام / انا اعمل اى حاجه علشان اوصل ليكى شخصيآ
زهراء / وع.ع.عايز منى ايه
اسلام / عايزك
زهراء / انت قليل الادب ومش محترم
اسلام / انتى فهمتينى غلط انا اقصد عايزك صديقه ليا مش اكتر نكون اصدقاء بس وتدخلى الشله بتاعتى
زهراء / احم اسفه بس طريقتك خلتنى افهم غلط
اسلام / حصل خير ها موافقه نكون اصدقاء
زهراء / سكتت شويه وقالت بس ساره مش هترضى
اسلام / انا مالى بساره وزفتت الطين دى انا اصلا ميشرفنيش اعرف واحده زيها انا اهم حاجه عندى انتى
زهراء/ بس هى صحبتى الوحيده ومقدرش اعمل حاجه من غيرها
اسلام / مش لازم تعرف عنك كل حاجه
زهراء / بس احنا متعودين نقول كل حاجه لبعض ومقدرش ادارى عنها حاجه
اسلام / خلاص اوك براحتك سلام
زهراء / اسلام
اسلام / نعم
زهراء / انت زعلت
اسلام / لاء عادى براحتك دى حريه شخصيه
زهراء / بص احنا ممكن نسأل على بعض فى التليفون عادى لكن بلاش نتكلم مع بعض فى الجامعه علشان لو ساره شافتك واقف معايه هتزعل منى
اسلام / بضحكة خبث طبعآ اللى تأمرى بيه
زهراء / ماشى انا مضطره اقفل معاك علشان فى حد بيرن عليا
اسلام / اه طبعآ براحتك سلام
زهراء /سلام وقفلت مع إسلام وردت وقالت الو يا أمير
امير / بتتكلمى مع مين كل ده
زهراء / بتوتر د.د.دى واحده صحبتى
امير /صحبتك مين دى
زهراء / وانت يعنى تعرف كل اصحابى واحده انت متعرفهاش معايه فى الجامعه
امير / ماشى يا زهره بعد كده لما ارن عليكى وانتى بتكلمى حد اقفلى معاه وردى عليا علطول فاهمه
زهراء / حاضر
امير / قومى يلا جهزى نفسك علشان يدوب نلحق نوصلكم معانا فى السكه
زهراء /طيب انا هقوم اهو سلام
امير / سلام وقفل مع زهره وهو متعصب وحدف التليفون على السرير وقام دخل الحمام
زهراء / قامت من على سريرها خرجت من اوضتها ودخلت الحمام اخدت شاور ولبست هدومها واتوضت وخرجت دخلت اوضتها أدت فرضها وخرجت تانى وقالت صباح الخير
نبيله وريم / صباح النور
زهراء / بصت لريم وقالت عامله ايه دلوقتى
ريم / الحمدالله كويسه
وفى الوقت ده خرج شريف من اوضه ولعب فى شعر ريم وزهراء وقال
شريف / صباح الخير يا مزز
ريم / صباح الخير يا أبيه
زهراء / صباح النور يا شيفو
شريف / بص لأمه وقال صباح الخير يا مصر
نبيله / صباح النور يا حبيبى
اخوك صحى ولا لسه نايم
شريف / لاء مقتول جوه
ريم / اوعى تقوليلى ادخلى صحيه
زهراء / ولا انا انتى عارفه أن انا وهو مش بنتفق مع بعض
نبيله / بصت ليهم الاتنين ودخلت هى الاوضه وقالت سامح يا سامح اصحه يلا
سامح / ………….
نبيله / يا ابنى يا حبيبى قوم هتتأخر على الشغل
سامح / وهو مغمض عينه اطلعى بره يا ريم علشان مقومش أمد ايدى عليكى
نبيله / انا امك يا ابنى مش ريم
سامح / فتح عينه بصعوبه وقال صباح الخير يا ماما
نبيله / صباح النور يا حبيبى قوم يلا يدوب تلحق تاكل لقمه وتروح شغلك
سامح / حاضر يا ماما
نبيله / خرجت من الاوضه ودخلت المطبخ تحضر الفطار هى وريم
سامح / قام وخرج من الاوضه بتاعته ودخل الحمام وبعد وقت خرج تانى ودخل اوضه واده فرضه وخرج قعد على الطبليه وقال ماما اعملى حسابك أن ممكن أتأخر النهارده بره
نبيله / خير يا حبيبى فى حاجه
سامح / لاء يا ماما متقلقيش عندى درس النهارده
نبيله / ماشى يا حبيبى ربنا يرزقك ويوسع رزقك يارب
وقعدو يفطرو وبعد وقت خلصو اكل ودخل شريف لبس هدومه وخرج هو وزهراء راحو عند امير وخبطو على الباب
ساره / فتحت ليهم وقالت احلى صباح لاحلى جوزين عصافير
شريف / صباح السعاده والهنا على احلى سرسور فى الدنيا
زهراء / صباح النور يا ساره
ساره / تعالو ادخلو
شريف / على ايه ندخل ونتعطل لو خلصتو يلا بينا
ساره / امير يا امير يلا علشان نازلين
امير / جه وقال صباح الخير
الكل / صباح النور
شريف / مال وشك مقلوب على الصبح كده
امير / مفيش يلا بينا
نزلو الاربعه مع بعض وركبو تاكسى وكل شويه امير يبص على زهراء فى المرايا بغيظ
لحد ما وصلو الجامعه نزلت زهراء وساره ولسه هيمشو
امير نده على زهراء ونزل من التاكسى وراح عندها
زهراء / وقفت وهى متوتره وقالت ن.ن.نعم
ساره / احم طيب انا هدخل استناكى جوه
زهراء / ماشى
امير / زهره انتى النهارده عصبتينى لما قعد ارن عليكى ومردتيش
زهراء / قولتلك كنت بكلم واحده صحبتى
امير /مين اهم انا ولا هى
زهراء / احم انت طبعآ بس مكنش ينفع اقفل معاها علشان ارد عليك وعمومآ حقك عليا
امير / ماشى يا زهره بلاش تعملى كده لانك عارفه أن كده بيعصبنى
زهراء / حاضر يا امير ممكن بقى تسبنى ادخل
امير / ماشى يا زهره ادخلى بس خلى بالك على نفسك
زهراء / حاضر باى ودخلت وهى قلبها كان هيقف عليها وقالت لنفسه يا لهووووى لو عرف أن اللى كنت بكلمه واحد مش واحده ده كان نيل الدنيا الحمدالله جت سليمه وهى داخله خبطت فى اسلام وهى مش واخده بالها
اسلام / اه مش تف وسكت وضحك وقال هو انتى
زهراء / سورى مكنتش اقصد
اسلام / ههههههههههه لاء عادى ولا يهمك واحده بواحده كده اتعادلنا
زهراء / ماشى عن اذنك علشان ساره جايه علينا ومشيت وسابته
ساره / جت بعصبيه وقالت الولا ده كان عايز منك ايه
زهراء / أهدى يا بنتى انا اللى خبطه وانا مش واخده بالى
ساره / انتى عبيطه يا بت مش تفتحى
زهراء / اهو اللى حصل بقى يا ساره
ساره / انتى متخانقه مع امير ولا ايه
زهراء / ها ل.ل لاء
ساره / ماشى يلا بينا ندخل زمان المحاضره بدأت ودخلو الاتنين المحاضره
اسلام / كان واقف مع شلته وبيضحك وبيهزر وقال ايه رأيكم فى الحته اللى لسه خبطه فيا دلوقتى
شاب من الشله / صاروخ ارض جو
اسلام / اهى دى القطه الجديده اللى بوقعها
الشاب / اوبا يا بختك يا ابن المحظوظه
شاب تانى / بس دى شكلها محترم وهتتعبك ومش هتسلم نفسها ليك بسهوله
اسلام / مش هتسلم برضاها فى كذا طريقه المهم البت دى ايام وهتكون فى حضنى على السرير بتاعى انا حاليآ بحاول افتح معاها سكه وادخلها معانا الشله علشان تسهل معايا دخولها الفيلا
الشاب / دماغ شيطان
اسلام / يا ابنى ده انا ابليس يتعلم منى ههههههههههههههه
الشاب / ايه رأيك تعزمها على البارتى بتاع بكره ولو جت تقدر تاخد اللى انت عايزه منها بالرضا أو بالغصب واحنا برضه ينوبنا من الحب جانب وندوق الحلويات دى
اسلام / اهدا على الزبون شويه علشان متطفش مننا ونوصل للى عايزينه
الشاب / عندك حق والأيام جايه كتير
اسلام / اشطا عليك تعجبنى لما تفهمنى علطول
احمد / كل ده كان قريب منهم وسامع كلامهم
وبتصعب عليه حل المشكله اكتر
__________________________________
فى شقة توفيق
لبست ريم هدومها وخرجت من اوضتها وقالت
ريم / ماما انا نازله عايزه حاجه
نبيله / من المطبخ لاء يا حبيبتى عايزه سلامتك
ريم / فتحت الباب وخرجت ولسه هتنزل الباب عند محمود اتفتح وخرج من الشقه وقفل الباب وقال
محمود / صباح الخير
ريم / مردتش عليه ولسه هتنزل
محمود / ريم
ريم / وقفت من غير ما تبص ليه وقالت نعم
محمود / انا اسف
ريم / بصت ليه وقالت اسف اسف على ايه ولا ايه اسف على اللى حصل ليا امبارح فى الكليه ولا اسف على وجعى ودموعى اللى منشفتش على خدى بسببك ولا اسف على كسرتى قدام اهلى ونفسى ولا على ايه بالظبط يا محمود
محمود / على كله يا ريم على اللى حصل فى الكليه امبارح وعلى وجع قلبك بسببى
ريم / ياريت الكلمه دى كانت داوه تداوى الجروح لكن العكس الكلمه دى بتوجع اكتر لما يكون الجرح كبير
محمود / قولى عايزه اعملك ايه علشان اطيب ليكى جرحك وانا اعمله علطول وربنا
ريم / ابعد عنى وسبنى فى حالى خلينى اركز فى مستقبلى اهم
محمود / صعب انا ما صدقت لاقيت البنت اللى تحرك جوايا مشاعر حلو ليها
ريم / بأستغراب مشاعر
محمود / ايوه يا ريم انتى الوحيده اللى حركتى قلبى من مكانه
ريم / سكتت شويه وقالت مينفعش يا محمود خلاص
محمود / ليه يا ريم
ريم / لان لو بقى بنا حاجه انا بثبت كلام سلمى عليه وانا اغلى حاجه عندى سمعتى يا محمود
محمود / ارد ليكى اعتبارك قدام الكليه كلها
ريم / لاء يا محمود مبقاش ينفع صدقنى
محمود / ريم انتى بتحبينى بس كبريائك منعك تقولى ليا كده
ريم / بضحكت انكسار كنت
محمود / ومازلتى عينك فضحاكى
ريم / بدموع ارحمنى بقى يا اخى وابعد عن طريقى
محمود / ادينى فرصه صغيره اتغير فيها علشانك وابقى بنأدم تانى على ايدك
ريم / انا لاء يا محمود مش انا البنت اللى هتفرح بكام خروجه معاك وتتسلى بيا وبعدين ترمينى زى ما راميت بنات قبلى وروحت دورت على غيرها
محمود / لاء والله انتى غيرهم يا ريم
ريم / هههههههه وتفتكر هصدقك مش انت اللى بلسانك قولت مفيش حب
محمود / كنت غبى ومكنتش شايفك قدامى
ريم / وكام مره قولت الكلام ده للبنات عشره عشرين أربعين مره
محمود / بصدق ولا مره يا ريم انتى غيرهم انا بح
ريم / قطعته وقالت ارجوك متكملش بلاش تقول حاجه انت مش قدها والكلمه دى معانيها كبيره اوى على واحد زيك عن اذنك وسابته ونزلت
محمود / مشى أيده على شعره من وراه وقال شكل البت ساره عندها حق هتعب اوى معاها ونزل وراها لاقها بتركب تاكسى وراحت على الجامعه وقف تاكسى هو كمان وراح على مكتبه
__________________________________
فى المدرسه
وصلت روز المدرسه وهى مختلفه عن كل يوم كانت مبسوطه وسعيده انها هتنتقم من سامح قعدت وقعدت جنبها جهاد وقالت
روز / هاى يا جوجو
جهاد / هاى ورحمة الله وبركاته شكلك مبسوطه وفرحانه اوى
روز / اوى اوى يا جوجو اخيرآ سامح هيجى عندى الفيلا وهنتقم منه
جهاد / ايها الروح الشريره اخرجى من البت اخرجك يا بنت الكلب مش عايزه تخرجى انى اسف ههههههههههه
روز / هههههههههههه لاء انا مسكه فيا الروح الشريره دى ومش هتخرج غير لما انتقم من البنأدم ده
جهاد / ربنا يجعل كلامنا خفيف عليه احسن ده بيجى على السيره
روز / نفسى الوقت يجرى ويجى الوقت اللى هيدخل عندنا الفيلا ويعرف أن اللى هيديها الدرس انا واو هتبقى مفاجئه فظيعه
جهاد / دى هتبقى مفاجئه دمار شامل مش بعيد يتشل فيها وربنا هههههههههههههه
وفى الوقت ده دخل سامح وقال
سامح / صباح الخير يا بنات
جهاد / مش قولتلك بيجى على السيره
روز / ههههههههه عندك حق
سامح / الحماره اللى بتتكلم وبتضحك تحط لسنها فى بؤقها وتسكت
روز / بصت ليه بغيظ وقالت بصوت واطى اهو انت اللى حمار وستين حمار
جهاد / سمعت روز حطت ايديها على بؤقها وكتمت ضحكتها
وطول الشرح كان الاتنين سامح وروز بيبصو لبعض بتحدى وكره وكبرياء
وبعد وقت انتهى سامح من الشرح وقال
سامح / ياريت البنات اللى كانت مركزه فيا طول الشرح تركز فى دراستها اكتر منى وكان بيتكلم وبيبص لروز
روز / بصوت مسموع واستغراب what
جهاد / وهى بتكتم ضحكتها اتفضحتى يا سوسو
روز / مين مركز معاه انا
جهاد / ههههههههه مفيش غيرك اللى بيبص ليها
سامح / بص بقرف لروز وخرج
روز / وربنا هتشل منه بنأدم مستفز استفزاز موصفش الصراحه ده أهله ازاى بيستحملو ده
جهاد / فكك منه فاضل على الحلو تكه ويقع تحت ايد اللى مبيرحمش ههههههههه
روز / ههههههههههههههه
ودخل المدرس التانى وبدء يشرح ليهم الدرس
__________________________________
فى الشركه عند شريف وامير
وصلو الاتنين الشركه وكل واحد استلم شغله
فى مكتب شريف
تليفون المكتب رن شريف بص ليه وعرف أن اللى متصله بيه لميس اخد نفس وخرجه بهدوء ورد على التليفون
شريف / ايوه يا فندم امرى
لميس / افندم تانى يا شريف
شريف / امرى حضرتك
لميس/ تعال المكتب عندى عايزاك
شريف / ممكن اعرف السبب لان لو سبب مش مهم يبقى بلاش احسن والوقت ده استفاد بى فى الشغل
لميس / بأستغراب هو انت ليه بتتكلم معايه كده يا شريف
شريف / بتكلم مع حضرتك ازاى انا ملتزم بالحدود اللى ما بنا
لميس / حدود، حدود ايه دى
شريف / حضرتك بنت صاحب الشركه والمديره هنا
لميس / احنا مش اتفقنا نكون اصدقاء يا شريف
شريف / يا فندم العين عمرها ما تعلى على الحاجب وحضرتك فين واحنا فين
لميس / وهى كاتمه الدموع فى عينيها بس مكنش ده كلامك من يومين ايه سبب التغير المفاجئ ده حصلت حاجه منى ضيقتك
شريف / فكرت فيها لاقتها مينفعش نكون اصحاب احنا مش من مستوى بعض انتى فوق واحنا تحت تحت خالص ولو سمحتى يا فندم لو حضرتك مش محتاجه منى حاجه هقفل علشان ورايا شغل كتير
لميس / بدموع اللى يريحك يا شريف وقفلت التليفون وحطت راسها على المكتب وقعدت تعيط
_________________________________
فى شقة توفيق
كانت امينه ونبيله قعدين بيشربو الشاى مع بعض
نبيله / مش عارفه قلبى واكلنى على البت زهره اوى كده ليه
أمينه / استعيذى من الشيطان الرجيم وان شاءالله خير
نبيله / علطول قلبى واجعنى على البت دى تهوره واستهتارها بيخلونى اخاف عليها طايشه اوى فى تصرفاتها وتملى بصه لعيشت غيرها
أمينه / معلش يا نبيله راحت ولا جت عيله وبكره بعد الجواز هتعقل لما تكون ملزومه ببيت وراجل وعيال
نبيله / عيله ايه بس دى عندها اتنين وعشرين سنه وانا فى سنها كان معايه شريف وحامل فى سامح بس كنت اعقل منها بكتير وريم اهى اصغر منها بكام سنه بس عقله وهاديه فى نفسها كده
أمينه / مش كل الاخوات زى بعض طيب بصى امير ايه ومحمود ايه الاخوات بيختلفو فى الطباع
نبيله / ربنا يهديها ويريح قلبى من نحيتها ويقرب ليهم البعيد ويسعدهم
أمينه / اللهم امين إن شاءالله النهارده نستنا توفيق لما يطلع من المحل ونكلمه على زهره
نبيله / انا قولتله وهو مقلش حاجه قال يشوف الوقت اللى فاضى فيه ويجى يطلبها منه
أمينه / ربنا يسعدهم ويهنيهم ويرزقكم يا ساره ويا ريم بولاد الحلال
نبيله /يارب بس سؤال كده كنت عايزه اعرفه منك
أمينه / اسألى يا اختى اللى انتى عايزاه
نبيله / هو امير هيجيب الشقه منين
أمينه / هشوف ليه جمعيه ولا اتنين ادخلو فيهم ويخدهم ويجيب شقه وانا عندى كام حتة دهب بتوعى كان الحاج الله يرحمه جايبهم ليا تقال يعملو مبلغ هبعهم واديلو الفلوس يكمل بيها الفرش وكده
نبيله / ربنا يسهل ليه الأمور الوليه سعديه بتاعة الخضار بتلم فى جمعيه كبيره لو قولتلها على الأدوار الاوائل مش هتقولك حاجه هى بتحبك
امينه / ابقى البس العبايه وانزلها كده واشوفها هتعمل معايه ايه واللى فيه الخير يقدمه ربنا
نبيله / يارب
__________________________________
فى الجامعه عند ريم
دخلت ريم الجامعه وهى بتدعى ربنا متشوفش سلمى قدامها بس اتفاجئت بيها
سلمى / اهلا بخطافت الرجاله الست المحترمه اللى بتقضيها مع الشباب
ريم / سلمى ابعدى عن وشى وملكيش دعوه بيا
سلمى / ولو مبعدش هتعمل فيا ايه هتحدفينى بالورقه تعورينى هههههههههههه
ريم / اللهم يطولك ياروح عايزه منى ايه محمود عندك اشبعى بي حاجه متخصنيش
سلمى / قربت منها ومسكتها من دراعه وقالت فكك شويه بقى من التمثيل شوفى سلمتيه ايه من جسمك علشان كده سبنى وراح ليكى
ريم / رفعت ايديها وضربتها بالقلم على وشها وقالت اخرسى انا اشرف منك ومن عشره زيك مش انا يا ماما اللى بتسلم جسمها للرجاله فاهمه ولسه هتمشى
سلمى / بتضربينى يا بنت ******* وربنا ما انا سيباكى ورفعت ايديها ولسه هتضربها ايد مسكتها وقالت سلمى
ريم / محمود
محمود / وهو ماسك ايديها وقال لو فكرتى مجرد تفكير تمدى ايدك عليها ولا تأذيها هتشوفى الوش التانى بتاع محمود وبتهيألى كده انك مش هتحبيه
سلمى / بدموع بس هى اللى مدت ايديها عليا الاول يا محمود
محمود / وانتى اللى بتسوء سمعتها فى الجامعه يبقى تستهلى
سلمى / انت بدافع عنها بصفتك ايه ها دى واحده خطافت رجاله وعايزه تخدك منى
محمود / هى مش خطافت رجاله انتى اللى خطافت رجاله لان هى خطيبتى من قبل ما اعرفك
ريم / بصت ليه بصدمه
سلمى / بدموع خطيبتك ط.ط.طيب ازاى وليه مقالتش وانت مدام خاطب كنت بتعرفنى ليه
محمود / امبارح لما سبتك ورحت وراها كنت بحاول اصالحها لأنها عرفت أن اعرفك عليها وليه مقالتش محبتش تصدمك وعرفتك ليه وانا خطبها علشان انا واحد حمار وغبى
ريم / كانت كل ده مصدومه
سلمى /يعنى كنت بتتسلى بيا منك لله يا شيخ
محمود / اياكى بعد كده تتعرضى ليها فاهمه وبصوت عالى قال يا جماعه ريم خطيبتى سمعتو خطيبتى واى حد هيدوس ليها على طرف انا اللى هقفلو فاهمتو ومد أيده مسك ايد ريم وخرج من الجامعه
ريم / خرجت معاه من غير ما تنطق ولا كلمه وبعد وقت بصت على أيده وهى ماسكه ايديها ومره واحده شدتها وقالت ا.ا.انت ايه اللى عملتو ده وازاى تسمح لنفسك تمسك ايدى كده وازاى تقول انك خطيبى انت مجنون مش طبيعى على فكره
محمود / كان لازم اعمل كده علشان ارد ليكى اعتبارك قدام الجامعه كلها ولو معملتش كده كانت سلمى هتفضل مستقصداكى علطول وبالذات بعد القلم اللى انتى ادتهولها
ريم / حاجه متخصكش مركز ليه معايا وفى حياتى انت وجودك فيها غلط اساسآ مطلبتش مساعدتك علشان تيجى تعمل كده قولى ايه العمل دلوقتى الجامعه كلها عرفت أن انا مخطوبه هعيش فى كدبه بسببك منك لله يا اخى
محمود / انا اسف بس ملقتش حل غير ده والله
ريم / لحد هنا وكفايه يا محمود لا عايزه اشوف وشك ولا اسمع صوتك تانى وبصت ليه بقرف ومشيت وسابته
محمود / مشى أيده على شعره من وراه وبص على ريم لحد ما ركبت التاكسى ومشيت وشاط الارض برجله وقال المشوار لسه فى أوله مش هيأس وهفضل وراها
___________________________________
فى الشركه عند امير
جه وقت البريك ونزل عنده شريف وراحو ياكلو فى المطعم زى كل يوم
امير / مالك يا ابنى قالب وشك كده
شريف / مفيش بدأت أكره لميس فيا بس مش عارف ليه اضيقت علشانها لما سمعت صوتها كأنها بتعيط
امير / ليه انت هببت ايه
شريف / ولا حاجه بس عرفتها أن احنا مش من مستوى بعض علشان نبقى اصدقاء
امير / غبى برضه نفذت اللى فى دماغك
شريف / ايوه يا أمير كده احسن بكتير بدل ما تتعلق بيا اكتر من كده
امير / بس انت زعلت علشانها يبقى بدأت تتشد ليها بس مش عايز تعترف بكده
شريف / لاء يا امير انت غلطان بس صعبت عليا يمكن علشان حطيت اختى مكانها مش اكتر
امير / لاء يا شريف مش هو ده السبب انت بدأت تحبها
وفى الوقت ده جت لميس عندهم وقالت
لميس /السلام عليكم
امير وشريف / وعليكم السلام
امير / اتفضلى اقعدى
لميس /قعدت وكانت بتبص على شريف
شريف / وقف وقال انا اكلت الحمدالله عن اذنكم
لميس / وقفت وقالت لاء خليكى انت كمل اكلك انا اسفه لو ازعجتك
شريف / بصلها وقال انا اللى همشى خليكى انتى وسابهم ومشى
لميس / قعدت وحاولت تحبس دموعها
امير / متزعليش منه بس هو شريف كده من نحية البنات
لميس/ بس مكنش كده اليومين اللى فاتو معرفش ايه غيره من نحيتى فاجئه
امير / علشان بدأ يتشد ليكى
لميس / بصت ليه بصدمه
امير / ايوه شريف صحبى وانا عارف ايه اللى بيحصل جواه من غير ما يقول ولا كلمه وهو علشان بدأ يحس بحاجه من جواه ليكى غير المعامله معاكى علشان ميتعلقش بيكى اكتر من كده وعلى ما اعتقد انتى كمان بتحبيه صح
لميس / بصت ليه بدموع وهزت راسها بمعنى ايوه
امير / واضح اوى انك بتحبيه وهو برضه حس بكده
لميس / طيب مدام كده ليه عايز يبعد عنى
امير / بصى كل اللى اقدر اقوله ليكى أن هو بيكره علاقات الحب وكده لسبب معين وتانى حاجه شريف زى اى راجل شايف الفرق فى المستوى صعب يبقى فى توافق وكل اللى هيعرف بالعلاقه ما بنكم هيقول أن هو طمعان فيكى و فى فلوسك فهمتينى هو ده اللى فى تفكير شريف دلوقتى وهيحاول يعمل بكل طريقه علشان يكرهك فيه لو انتى بتحبيه بجد تقدرى تستحملى كل ده وتشديه ليكى اكتر
لميس / بس ولا انا ولا بابا بنفكر بالطريقه دى وانا حبيبت شريف من زمان اوى وعمر ما بصيت لفقره الفقر عمره ما كان عيب المهم الحب وراحة البال وانا مستعده اعيش معاه لو فى اوضه فى شقة أهله والله عادى جدآ بالنسبه ليا بس اهم حاجه عندى ابقى جنبه العمر كله واسمى يتكتب على اسمه
امير / يبقى متيأسيش وحاولى معاه مره واتنين وتلاته وفى الاخر هيسلم ليكى وانا هفضل اكلم فيه لحد ما اقنعه يسيب نفسه للحب
لميس / بضحكة على فكره انت طيب اوى اوى يا امير ياريت تعتبرنى زى اختك
امير / انتى اللى ياريت تعتبرينى زى اخوكى ولو احتاجتى اى حاجه قوليلى عليها علطول
لميس / شكرآ يا أمير
امير / البريك خلص يلا نروح على الشركه
لميس / يلا ومشو الاتنين على الشركه
__________________________________
فى فيلا روز
وصلت روز وهى متحمسه جدآ للمقابله ودخلت اوضتها ولبست هدوم قصيره جدآ وقعدت كل شويه تبص على الساعه وتبص من عندها على الباب لحد ما شافت سامح وصل قعدت تنط بفرحه وتصقف بأيديها وراحت عند الباب بتاع الاوضه بتاعتها وفتحته ووقفت تسمع الكلام اللى هيحصل ما بين ابوها وسامح
عند سامح وصل ودخل وقال للشغاله اسمه وقعد على الكرسى يستنا نزول سليم وشويه ونزل سليم من فوق وسلم عليه
سليم / اتفضل يا ابنى
سامح / شكرآ لحضرتك وقعدو الاتنين وبص سليم ليه وقال
سليم / بس انت صغير اوى على انك تدرس للبنات فى الثانويه انا فكرتك راجل كبير
سامح / حضرتك التدريس مش بالسن الحمدالله انا متفوق فى اختصاصى وعلى ما اعتقد الأهالى كلهم بيشكرونى على مستوى بناتهم
سليم / انا مقصدش حاجه والله انا بقول يعنى دى حاجه حلوه المهم انا كنت عايزك تدى بنتى درس علشان هى متعرفش اى حاجه فى المنهج خالص
سامح / تمام يا فندم انا إن شاءالله هخليها تحفظ المنهج بطريقه سهله وممتازه وهتشوف حضرتك الفرق فى الايام الجايه
سليم / أن شاءالله وبالنسبه للمرتب ميهمكش حاجه واده ليه ظرف وقال كل شهر أن شاءالله هتاخد زيهم
سامح / فتح الظرف وبص فيهم وقال بس حضرتك ده كتير
سليم / ولا كتير ولا حاجه انت هتبدأ مع بنتى من الصفر
سامح / اخد فلوس معينه وقال ده حقى مش باخد اكتر من حقى حضرتك
سليم / بس انا اللى اديتهم ليك مش انت اللى طلبتهم
سامح / اسف حضرتك انا بمشى بمبدأ واحد وحط بقيت الظرف على الطرابيزه
روز / كانت بتسمع من فوق الكلام وكانت مستغربه سامح جدآ واستغربت اكتر لما مرضاش ياخد اكتر من حقه
سليم / هتبدأ من امته إن شاءالله
سامح / من دلوقتى لو مفيش عند حضرتك مانع ممكن تنده على بنت حضرتك
سليم / تمام انا هطلع اندها ليك واسيبكم براحتكم تديها الدرس
سامح / تمام انا منتظرها
سليم / عن اذنك وسابه وطلع لروز
روز / دخلت تجرى على اوضتها وعملت نفسها مشغوله
سليم / دخل الاوضه عند روز وقال يلا يا حبيبتى المدرس جه تحت وهيبدأ معاكى من النهارده
روز / اوك دادى وخرجت من الباب ونزلت من على السلم بكل كبرياء
سامح / سمع صوت الكعب نازل من على السلم بص على الصوت لحد ما وصل لوش روز واتصدم
روز / نزلت عنده ووقفت قصاده وربعت ايديها على صدرها وبضحكت غيظ قالت هاى
سامح / بصدمه انتى
روز / بأستفزاز منور يا مستر الفيلا عندنا
سامح / انتى مفكره نفسك كده بتلوى دراعى
روز / مشيت من قدامه وقعدت على الكنبه وحطت رجل على رجل وبصت على ضوافيرها وقالت امممممم انت شايف ايه
سامح / اتغاظ منها وراح شدها من دراعها وقال بعصبيه لما بكون بكلمك تقفى وتتكلمى معايا بأسلوب احسن من كده
روز / ااااه دراعى يا حيوان
سامح / انا هوريكى الحيوان ده هيعمل فيكى ايه
روز / قعدت تشد دراعها من ايد سامح وتقول سيب دراعى يا متخلف سيب بس وهى بتزقه وقعت فى حضنه ورفعت راسها وبصت ليه فى عينيه
سامح / سرح فى عينيها وفى ملامحها وبعد كده اخد باله من الوضع زقها وقال انا مستحيل اقعد هنا ولا اديكى الدرس
روز / علشان انت جبان وخايف منى
سامح /ههههههههه انا هخاف منك انتى
روز / امال ايه السبب
سامح / علشان ميشرفنيش أدى واحده زيك
روز / لاء انا اللى هموت علشان تدينى
سامح / لاء ما هو واضح صح انك مش هتموتى خالص
روز / متخدش الم فى نفسك بس ده انت حتة مدرس فاشل وخايف تدينى لاشوف فاشلك ده
سامح / لا والله ماشى يا روز انا هديكى الدرس واستحملى اللى هيحصلك منى
روز / بضحكت ثقه لاء استحمل انت اللى هيحصلك منى انا
سامح / ههههههههههه بقى انتى يا حتة عيله بتهددينى انا هههههههههههه
روز / بغمزه هتشوف العيله دى هتعمل فيك ايه
سامح / بضحكت ثقه ماشى لما نشوف منك انت يا خطير ههههههههههههه
روز / لاء الضحك مش دلوقتى الضحك هيكون فى الاخر
سامح / قعد وقال حلو اوى تعالى بقى نبدأ الدرس
روز / مشيت بثقه وراحت قعدت جنبه وحطت رجل على رجل وقالت جاهزه
سامح / اول حاجه من الاحترام لما يكون مدرسك بيديكى الدرس تنزلى رجلك وتقعدى قدامه بأحترامك
روز / والله انا حره اقعد زى ما انا عايزه
سامح / اللهم يطولك ياروح مش هنضيع الوقت كله فى ازاى تقعدى
روز / والله قول لنفسك الكلام ده
سامح / نفخ وفتح الكتاب وقال نبدأ
روز / انا جاهزه
سامح / بدأ يشرح ليها الدرس وفى الوقت ده جابت الشغاله العصير لسامح
روز / اخدته منها وقالت ميرسى يا داده
الشغاله / العفو يا حبيبتى وسابتهم ومشيت
روز / جت فكره فى دماغها وسرحت فيها
سامح / اخد باله من سرحان روز وقال ممكن تركزى شويه
روز / ها ا.ا.اه طبعآ بس الاول اتفضل العصير وعملت نفسها بتديله العصير ووقعته عليه
سامح / اتصدم من اللى حصل وقال ا.ا.ايه اللى انتى عملتيه ده
روز / اوه سورى يا مستر مكنتش اقصد
سامح / بغيظ والله انا متأكد انك عاملها قصد
روز / بدلع مظلومه يا مستر حتى بص وقع على رجلى انا كمان وشاورت على رجليها اللى باينه من الجيبه القصيره
سامح / بص مكان ما شاورت على رجليها العريانه وبلع ريقه بالعافيه وقال م.م.ممكن ادخل الحمام انضف هدومى اللى انتى وقعتى عليها العصير
روز / طبعآ يا مستر اتفضل وقامت وقفت وشاورت ليه على الحمام واول ما سامح دخل الحمام قعدت تنط من الفرحه وتقول yes yes وادى اول جوله انا اللى فوزت بيها ده كده تسخين لسه مشوفتش منى حاجه يا مستر ههههههههههه ومسكت الدبدوب بتاعها وحضنته وقعدت تلف بيه بس خبطت فى سامح اللى كان واقف يبص عليها
سامح / خلصتى العبط اللى كنتى بتعمليه ده
روز / ه.ه.هو انت هنا من امته
سامح / من ساعة ما كنتى بترقصى بالدبدوب
روز / احم م.م.ماشى
سامح / خلصتى لعب العيال ده علشان نبدأ
روز / yes
سامح / اتفضلى اقعدى وقعدو الاتنين وبدأ سامح يشرح الدرس بتاعه وبعد وقت خلص وروح البيت
روز / دخلت اوضتها ونامت على سريرها وبصت على السقف وجت صورة سامح قصاد عينيها غمضت عينيها وقالت بأستغراب what هو انا ليه شوفت صورته فتحت عينيها وقالت بس الصراحه حلو اوى واول مره اشوف شكله عن قرب واو شكله جميل جدآ اجمل واحلى من شباب امريكا بكتير ايه ده اللى انا بقوله ده لالالا انا شكلى بقيت crazy انا بكلم نفسى مسكت تليفونها وطلبت جهاد
جهاد / هاى
روز / هاى
جهاد / عملتى ايه يا مزه مع المستر النهارده
روز / عملت فيه عمايل بس شكله أو ما اتفاجئ بيا يموت من الضحك هههههههههههه
جهاد / هههههههههههههه انا متخيلها تلاقيه اتصدم يا عين امه ههههههههههه
روز / ضحكت وقالت ليها على العصير وحكت كل حاجه حصلت ما بينهم
جهاد / وهى مش قادره تمسك نفسها من الضحك قالت يخربيتك وقعتى عليه العصير ده انتى مصيبه
روز / لاء ده كده ولا حاجه ده انا هخليه يقول حقى برقبتى ههههههههههههه
جهاد / جدعه يا بت تربية بره بس شغل بنت بلد اصيله هههههههههههه
روز / هههههههههههه باى يا بت بلدى
جهاد / اشطا عليكى يا مزه هستناكى بكره تطلعى عينيه فى المدرسه
روز / ههههههههه طبعآ باى
جهاد /باى
روز / قفلت التليفون مع جهاد وقالت انا وانت والأيام ما بنا يا مستر ههههههههه
__________________________________

يتبع…

لقراءة الرواية كاملة اضغط على : (رواية فتاة انحنت من أجل الحب)

About admin